Planvoludi pairs e mairs,
Començam un cors mercat per fòrça cambis: un institut reabilitat integraument, era aplicacion dera LEC (Lèi Educacion de Catalonha), eth nau calendari escolar, era digitalizacion des aules entàs escolans de 1èr e 2au dera ESO, e d’auti aspèctes qu'explicaram pendent eth cors.
Er esfòrç de toti es agents dera comunautat educatiua a segut subergessenta entà qu´ es vòsti hilhs/es siguen ena disposicion de gaudir d'un ensenhament ara nautada des expectatiues. Per açò, aguest cors er institut d’Aran tanben aplicarà eth Plan Estrategic dessenhat pendent aguesti dus darrèri ans, e se someterà a diuèrses auditories qu´an de certificar era Qualitat deth Centre.
Deishant de costat aguesti tèmes e d'auti que seràn comentadi enes diferentes charrades informatiues damb es familhes pendent eth principi de cors, vos comunicam a trauèrs d'aguest escrit ua sèrie de punts que consideram fòrça importanti:
Entà toti es escolans, pendent era prumèra semana de classa, eth tutor deth vòste hilh/a recuelherà er impòrt de 5 èuros en concèpte peth servici de missageria SMS.
Sus eth Projècte Educat 1x1 (ordenadors portatils): Eth Centre a de recéber pendent aguesta semana es cartes de pagament (subvencion de 150 èuros) des ordenadors portatils entàs escolans de 1èr dera ESO, e es escolans de naua incorporacion de 2au dera ESO. En moment que ne disposam vos convocaram entà balhar-les e explicar coma se realize eth procediment de crompa der ordenador.
Totun, entàs escolans de 1èr e 2au dera ESO vos informaram eth brèu sus era crompa des libres digitaus, que se realizarà a trauèrs dera Plataforma Virtuau ATRIA.
Vos arregraïm era vòsta collaboracion, e profitam entà desirar-vos un bon cors escolar.
Corauments,
Manel Serrabona
Director der Institut d'Aran
